(1 de setembro de 2001) 

No decurso das X Xornadas de Lingua e Literatura Galega organizadas por CIG-Ensino e a AS-PG presentabamos un relatorio, Internet, ferramenta didáctica no ensino da lingua e da literatura, no que recomendabamos que: "As TIC, nomeadamente a Internet, teñen que estar presentes en tódalas aulas, pero non como un tópico máis no currículo ou coma unha tecnoloxía, senón como un novo medio transversal, un medio ó que teñen que acceder tanto os rapaces coma a comunidade na que se insire o centro educativo".

No capítulo 7 de Da periferia á Rede retomabamos esta tese e, a falta doutro tipo de estudios, asumiamos o reto de analizar polo miúdo a actuación da administración local e autonómica para promover o uso das TIC no ensino non universitario.

Facer este tipo de afirmacións pode parecer palabras maiores cando suplementos especializados dalgún xornal dedican dobre páxina a loar o Libro Blanco de la Sociedad de la Información de Galicia desenvolvido pola Xunta de Galicia e, naturalmente, Telefónica, e que, nun esforzo "sen precedentes", verá a luz contra finais de ano. Postos a poñerlle data, pouco antes do 21 de outubro, atrevémonos a dicir nós.

Non obstante, si que nos imos referir ó apartado que na versión dispoñible do Libro Blanco, no web da Consellería da Cultura, denominan "Monografía de educación". Nun total de 32 páxinas, en que podemos encontrar dende unha síntese de reflexións de diferentes autores sobre o sistema educativo na sociedade da información, ó enunciado de iniciativas que se están levando a cabo en Senegal ou en Andalucía, ou unha listaxe de portais que agrupan a oferta de educación, resulta imposible atopar unha soa referencia en materia de educación (¡nin siquera unha ligazón ás contadas experiencias galegas!) ó noso país. Tendo en conta que se supón que este é o documento base para un hipotético debate, non resulta difícil prever o que pode dar de si, cando menos nesta área¹, o texto definitivo.

Como contraste, o mesmo día en que algún medio² facía un pecorrido máis que superficial polas monografías do Libro Blanco recibiamos a nova de que xa estaba dispoñible no web do Projecte Astrolabi³ o seu terceiro informe⁴, L’ús de les TIC per part de l’alumnat.

O informe, estructurado en oito apartados⁵, fornece unha máis que detallada radiografía das relacións do alumnado, de primaria a bacharelato, coas TIC e, asemade, detecta tendencias que lles permiten á administración e ós diferentes membros da comunidade educativa actuaren con perspectiva de futuro.

• Un observatorio dedicado a unha área temática, neste caso, o ensino non universitario, coordinado cos demais organismos que investigan sobre o desenvolvemento da SI.
• Existencia de estudios xerais e estudios por áreas (neste caso, a educativa).
• Coñecemento fidedigno da infraestructura da que se dispón (ordenadores, conexión, programas, periféricos...) e de cómo se está utilizando.
• Estudios sobre as demandas e actitudes do profesorado á hora de incorporar as TIC no seu labor docente e as expectativas e os usos que lles dá o alumnado.
• Partindo do coñecemento do que hai –en Cataluña, e non en Madrid- e do que apuntan tendencias –as propias, e non as dos EE.UU.- fomentar o debate con tódolos implicados utilizando un web interactivo que fornece, ademais, moitos máis servicios e información.

Diciámolo na Redada 8 "non nos importa que copien e ás veces ata agradeceriamos que o fixeran pero, xa postos, ¡por favor, que miren para aqueles modelos que teñen mellor pinta ou unha eficacia contrastada!".

Como diría o Zeca, "é o que fai falta".

____________________

1 Noutras, como na de economía, introducen preguntas, para formular o debate, que están vencelladas directamente ó ámbito educativo. Referímonos concretamente a algunhas do tipo: "¿Cómo fomentar una competencia entre centros de enseñanza en materia de oferta de formación en las nuevas tecnologías? Bono escolar o remuneración de los centros (sean públicos, concertados o privados, sean de enseñanza primaria, media, formación profesional, o enseñanza superior) según el número de alumnos matriculados en estas materias" (sic).

2 Vid. o suplemento "El Buscador" de La Voz de Galicia do 20 de agosto de 2001.

3 Trátase dun proxecto impulsado pola Fundació Jaume Bofill e a Universitat Oberta de Catalunya para promover unha reflexión sobre uso das TIC no ensino, crear un observatorio neutral que poida valorar o aproveitamento e uso que se fai das TIC neste ámbito e traballar na mellora da calidade educativa a partir do aproveitamento dos recursos dos que dispón a sociedade.

4 O primeiro está dedicado a analizar o equipamento informático dos centros (conexión á Rede, programas, número de ordenadores...) e o segundo, á actitude do profesorado ante o uso das TIC no ensino.

5 Presentación e metodoloxía; o uso nas escolas; o uso na casa; comparativa escola-casa; uso da telemática; Internet fronte ós libros; conclusións e anexos.

arriba

Subscríbase ás redadas

arriba