Espalla-las vantaxes e utilidades da Rede entre o conxunto da poboación é máis que necesario se pretendemos que Galicia non rexistre un dos índices de penetración de Internet máis baixos de todo o Estado. Agora ben, o que a sociedade galega precisa para non seguir á cola é un labor de divulgación sistemático e coordinado, non da improvisación, da trapallada e das fogueterías preelectorais que rodean a inciativas como Conéctate a Galicia.

Improvisación porque o mesmo 13 de xuño, día fixado para o comezo de Conéctate a Galicia, quen quixera acceder ó web que dende comezos de xuño se veu publicitando profusamente nos diferentes medios de comunicación encontraba unha pantalla a cachos en galego coa seguinte lenda: "Registrado por Xunta de Galicia. En activo a partir do 13/6/2001. En directo desde Redondela. Proximamente Conectateagalicia.com. Tu sitio de conexión en Galicia".

Trapallada, tanto porque o web incumpre o disposto na normativa sobre o uso de Internet aprobada pola propia Xunta coma polo pouco coidados que están moitos aspectos lingüísticos e comunicacionais.

Aínda que a páxina principal –esa mesma en que a cabeceira é INDEX e non, como cabería supoñer, Conéctate a Galicia- comezou estando só en galego, non tardou tempo en mudar e agora o usuario pode acceder á información en galego e castelán porque, en palabras dunha das persoas encargadas da carpa de "Conéctate a Galicia", "nos puede visitar y ver gente de fuera y hay que poner la información en castellano. Lo ideal es ponerla también en inglés pero era mucho rollo".

O que non aclarou o autor desas manifestacións é que o criterio lingüístico imperante no web é o bilingüismo anárquico. Así, por citar algún dos exemplos máis chocalleiros "las imágenes son en directo desde...."

Contrasta que o Director Xeral de Política Lingüística anuncie un autocorrector para Office en galego como xeito de introduci-lo uso da nosa lingua na informática e nas novas tecnoloxías e en "Conéctate a Galicia" o navegador instalado sexa o Explorer en castelán. ¿U-lo o XIS ou o Opera en galego?

Mención á marxe merece o tema das ligazóns, da información e do xogo para coñecer Galicia ó que se referiu Pérez Varela na presentación de "Conéctate a Galicia". Comezando por este último, o xogo do día 27 de xuño en Ferrol consistía en "localizar e imprimir algunha información publicada nos medios de comunicación sobre a Xunta de Galicia ou o teu Concello".

Seguindo pola información, en ningún dos apartados en que se estructura o web aparece unha explicación clara e detallada sobre en qué consiste "Conéctate a Galicia". É máis, o apartado destinado a este fin, "Información", só é intelixible para quen previamente escoitou falar do proxecto.

Tratándose dun proxecto que ten como obxectivo achega-la Internet ó conxunto da poboación, parécenos un tanto estraña a selección de ligazóns que se inclúen na páxina principal. Non entendemos, por exemplo, por qué no apartado dedicado ós "Xornais galegos" aparece Leña Verde e non aparece Vieiros. Outro tanto habería que dicir do criterio para agrupa-las ligazóns xa que, ademais dos xornais, non se inclúe ningún outro recurso galego que non dependa da Xunta de Galicia ou dalgún dos patrocionadores/colaboradores de "Conéctate a Galicia".

Foguetería electoral, por non estar enmarcada nun programa de actividades divulgativa e polas datas (xuño-outubro ou plena precampaña) e localidades en que se vai desenvolver (das 11 vilas escollidas ademais das sete grandes cidades, 9 delas (Lalín, Ortigueira, O Grove…) gobernadas polo PP.

En resumo, e nunca mellor dito, un novo "pelotazo" dos que tanto gusta Pérez Varela ou a historia de cómo unha iniciativa de divulgación da Rede aseméllase, en algo máis que na carpa, a un circo preelectoral.