Dende daquela é frecuente a aparición nos medios de comunicación de novas referidas a estudios e prospectivas sobre o importante déficit de expertos en informática que existe en Europa. Pola contra, sobrancean o caso da India, país que, curiosamente, destaca pola fuga de cerebros informáticos cara a outros mercados de traballo, tanto polas maiores posibilidades de emprego como polas mellores condicións laborais.

Sen embargo, segundo o dito informe, o sistema educativo galego neste eido, cos titulados que saen da Facultade de Informática da Coruña, a Escola Superior de Informática de Ourense e os ciclos formativos superiores de ensino LOXSE -poñéndonos no mellor dos casos- só alcanza a cubrir un 23, un 15 e un 25% da demanda prevista, polo cal se propón corrixir o sistema educativo para cubrir as necesidades e crear emprego.

¿Necesidades? ¿Emprego? ¿Déficit de expertos? ¿De que país estamos a falar? Boa parte deses aproximadamente 70 enxeñeiros informáticos, 140 enxeñeiros técnicos e 900 técnicos superiores que fornece anualmente o sistema educativo galego vense obrigados a emigraren a outros mercados laborais ou a aceptar traballar en condicións laborais moi inferiores ás que nos podemos imaxinar, logo da lectura destes informes, por incrible que pareza.

A competencia desleal das propias institucións públicas galegas, e sobranceiramente das universidades, dos seus proxectos e institutos de investigación, están facendo inviable o desenvolvemento dun sector da informática e das comunicacións propio do país, e xa que logo, a creación de emprego especializado a que se referían optimistamente tanto os anteditos informes da Unión Europea como Galicia 2010.

O desenvolvemento de proxectos de comunicación e informática semella ser, logo, á vista da realidade, un dos poucos eidos onde o sector público funciona mellor que o privado, para as mentes neoliberais... Se cadra un dos factores de competitividade importante é a reducción de custos que implica convocar bolsas de colaboración, en troques de promover a creación de emprego e de postos de traballo.

O novo portal da CRTVG, o web museocastelao.org do Consello da Cultura ou, o web da Deputación da Coruña, o proxecto de Aula Virtual da Universidade de Santiago... son casos de proxectos desenvolvidos a base de bolseiros. A Facultade de Informática da Coruña, o Instituto de Investigacion Tecnoloxica ou o portal agroforestal Agrobyte da Universidade de Santiago, que lideran servicios externos de desenvolvemento de webs e bases de datos, constitúen exemplos de competitividade fronte á empresa privada baseada na precarización de boa parte do persoal.