Os exemplos podelos usar empregando a utilidade de copiar e pegar. Podes seleccionar o texto do debuxo correspondente na páxina de exemplos e copialo. Vai logo á caixa de ingreso de comandos do galogo e pega alí o texto. Preme a tecla INTRO ou a tecla Ingresar (na pantalla) e verás como a tartaruga debuxa seguindo as instrucións.
Seguindo as instrucións do titorial intenta xerar un procedimento (crear unha nova palabra) que efectúe algún dos textos dos exemplos. Terás definida unha nova palabra do galogo, e poderala usar mesmo para definir outras máis complexas, velaí a potencia da linguaxe.
Desgrazadamente, ao tratarse dunha versión de navegador non poderás gardar o código xerado. Hai tempo que tíñamos en mente a posibilidade de traducir unha versión máis funcional do logo, pero estamos á espera de coñecer as necesidades que poida haber sobre o tema. Se probas o galogo e lle ves utilidade, ponte en contacto connosco e poderemos iniciar ese traballo.