Galogo foi o nome que lle demos a este recurso, mesturando as palabras galego e LOGO. O Logo é unha linguaxe de programación de ordenadores creada por Seymour Papert no MIT hai máis de 30 anos.

	Como recurso para o ensino o LOGO é unha aportación interesante. Focado á elaboración de gráficos e ao traballo con palabras, o labor en LOGO consiste en ir creando palabras novas a partir de palabras primitivas.

A base do logo radica na creación de gráficos ou debuxos movendo un punto (habitualmente representado por un triángulo) mediante ordes escritas. Ese punto é considerado, a efectos de ensino, como unha tartaruga que se manexa mediante palabras. Na nosa versión do logo, o galogo, estas palabras (as chamadas primitivas) están en galego. Por exemplo para facer avanzar a tartaruga 30 pasos usaremos ADIANTE 30.
A outra característica básica do logo é a construción de palabras novas a partir das primitivas (ou de palabras creadas polo usuario), de tal xeito que a aprendizaxe da linguaxe consiste en construír novas palabras. Por exemplo podemos definir os movimentos da tartaruga necesarios para debuxar un cadrado como CAIXA. A partir daí a orde caixa fará que a tartaruga debuxe o cadrado. Un debuxo máis complexo (por exemplo con cinco cadrados) pode consistir en repetir varias veces os debuxos máis sinxelos (por exemplo repetir CAIXA cinco veces).