galego21.net, en colaboración co Concello de Ferrol, facilítavos a seguir unha "Guía de recursos en Internet" pensada para posibilitarvos un contacto máis doado con sitios web maioritariamente galegos e en galego, pero tamén doutros ámbitos xeográficos e lingüísticos que nos son próximos, nomeadamente Cataluña e Portugal.

Quizais a algúns de vós vos sorprenda o número de sitios web na lingua de Galiza dos que dispomos na Rede, sobre todo pensando que a todos nos contaron o conto ese de que o mundo é en inglés, a tecnoloxía máis e o futuro máis aínda. Malia isto aínda hai persoas que cremos que inglés hai que saber, e chinés, e portugués, e occitano, e castelán, e asturiano, e ruso. Pero se non se sabe (ningún destes ou calquera outro que lle queirades engadir), cómpre ter a posibilidade de enredar igual na Rede, con tal programa ou con aquel xogo.

Por outra parte linguas como o inglés e o castelán contan xa con medios, falantes/creadores e recursos abondos tanto no espacio real (se é que tal cousa existe) coma no virtual (se é que, pola mesma, non é produto da nosa imaxinación).

En canto á selección é, evidentemente, produto dos nosos coñecementos, debilidades, gustos, afeccións e outras teimas varias. Aquí non están todos os que hai nin moito menos, o cal significa que vos queda a vós o reto de atopardes máis. Xa sabedes que para isto o mellor son os portais e os buscadores (mirade na sección da guía na que aparecen). É probábel que levedes unha sorpresa.

IMAXE | PLÁSTICAS | COCIÑA | COMUNICACIÓN E BUSCADORES | DEPORTES | ENREDOS (Chat, programas, xogos...) | INFORMACIÓN XERAL | LIBROS E LITERATURA | MODA | MÚSICA | PARA AS AULAS | POLÍTICA, SINDICATOS, ORGANIZACIÓNS, ONGs ... | PERSOAIS