Nesta páxina teremos os acordos e convenios de colaboración asinados por galego21.net con distintas entidades:

Universidade de Santiago de Compostela (acordo marco) | Concello de Ferrol (decembro 2000)

ACORDO MARCO DE COLABORACIÓN ENTRE A UNIVERSIDADE DE SANTIAGO DE COMPOSTELA (USC) E galego21.net

En Santiago de Compostela, o ... de ..............de 2000, reúnense o Sr. Darío Villanueva Prieto, rector da USC, con razón social no Colexio de San Xerome, na Praza do Obradoiro s/n de Santiago de Compostela, e mais o Sr. Roberto Abalde, presidente do Instituto de Desenvolvemento de Software en Galego, en diante galego21.net, con domicilio social na Rúa   %%%%%%    de Santiago de Compostela (A Coruña).

Ambas as partes recoñécense capacidade xurídica e poder abondos para obraren, e

EXPOÑEN:

1. Que a USC, segundo o art. 3.2 dos seus Estatutos, ten a obriga de promover, no marco das súas competencias, accións que contribúan á normalización e ó desenvolvemento da lingua galega.

2. Que galego21.net é unha asociación sen ánimo de lucro, que, segundo o artigo 2 dos seus Estatutos, ten como fins a) promover a existencia de software de libre distribución en galego, e b) promover a existencia de recursos galegos en Internet. Para isto a asociación pode levar a cabo, entre outras, as seguintes medidas:

• A realización, distribución e rexistro de programas e aplicacións informáticas en galego.
• A adaptación, traducción ó galego, rexistro e distribución de programas e aplicacións informáticas de libre distribución.
• A xestión ante os seus titulares dos dereitos de adaptación, traducción ó galego e distribución de programas e aplicacións informáticas.
• A organización de xornadas, congresos, seminarios, campañas estudios e outro tipo de actividades que contribúan ó estudio da situación do galego na sociedade da información e á divulgación do uso da lingua galega na informática e nas tecnoloxías da información e da comunicación.

3. Que tanto a USC como galego21.net consideran de interese común a cooperación en tales materias, e sobranceiramente, no desenvolvemento de productos de software en galego e na súa difusión.

4. Que é desexo da USC e de galego21.net subscribir un acordo marco de colaboración que instrumente e regule as súas relacións, con carácter xeral, e, de ser o caso, mediante convenios específicos.

Por todo o dito, ambas as partes acordan asinar este acordo marco de colaboración con base nas seguintes

CLÁUSULAS

1. O obxecto deste acordo marco é regular a colaboración entre a USC e galego21.net.

2. Ó abeiro deste acordo marco, realizaranse actividades e proxectos que obedezan ós obxectivos das dúas entidades, as cales deberán ser concretadas en cadanseu programa de colaboración específico, no que figurará:

• Definición de obxectivos
• Descrición do programa de traballo con indicación das súas fases
• Formulación e aprobación dos medios necesarios e do orzamento total asignado e, de ser o caso, da conseguinte partida presupostaria
• Relación ou provisión de participantes
• Calquera outro aspecto que se considere relevante

3. Dado que as actividades e proxectos que se realicen ó abeiro deste acordo marco deberán ser concretadas, este acordo marco non contén consignación presupostaria ningunha.

4. Este convenio comezará a producir os seus efectos a partir da data do seu asinamento, logo dos trámites pertinentes. Ha ter unha duración de dous anos, e poderá ser renovado tacitamente de non se manifestar en contra ningunha das partes.

5. As partes poderán denunciar ou modificar este documento en calquera momento e de mutuo acordo.

6. No caso de que algunha das partes decida rescindir este acordo marco, debe anunciarllo á outra parte con, cando menos, tres meses de antelación. Non obstante, os proxectos e actividades específicos que se estean a desenvolver no momento de se declarar a terminación deste convenio, continuarán desenvolvéndose ata a súa total conclusión baixo as bases que orixinariamente se acordaron.

7. O incumprimento de calquera das obrigas contraídas mediante este acordo marco por unha das partes facultará á outra para rescindilo, de xeito que queden automaticamente anulados tódolos dereitos correspondentes sobre o proxecto do programa realizado.

8. Os acordos que se reflicten neste convenio marco e nos convenios específicos a que dea lugar, teñen carácter administrativo, e non se derivan deles, con carácter xeral, dereitos ou obrigas laborais.

9. No prazo de 30 días hábiles contados a partir da data de asinamento do presente acordo marco, hase constituír unha comisión mixta, con representantes designados polos órganos rectores das dúas partes, en réxime de paridade. A dita comisión será o órgano de planificación, seguimento e avaliación das accións derivadas deste convenio marco, e entenderá e resolverá tódalas cuestións relacionadas cos posibles convenios específicos.

A comisión mixta hase reunir sempre que o solicite unha das partes, e cando menos unha vez ó ano presentaralles informes e propostas ós órganos rectores das dúas partes.

10. As cuestións litixiosas referidas á interpretación, modificación, resolución e efectos deste acordo marco han ser resolvidas, en primeira instancia, pola comisión mixta paritaria, e de non seren resolvidas por esta, hanse someter á resolución dun procedemento arbitral.

En proba de conformidade asinan o presente acordo marco en exemplares duplicados, no lugar e data indicados ó principio do documento.

Pola USC, O rector, Darío Villanueva Prieto

Por galego21.net, O presidente, Roberto Abalde

Por outra parte, o vicepresidente do Instituto de Desenvolvemento do Software Galego-galego21.net (IDESGA-galego21.net), don Camilo Regueiro López, veciño de Santiago de Compostela, en representación do citado instituto e con DNI %%%%%%